News portlet

Шардаралықтар ауыл бизнесін дамытуда

Шардаралықтар «Жұмыспен қамту – 2020 жол картасы» мемлекеттік бағдарламасының шарапатын көріп отыр. Жобаның екінші бағыты бойынша 2016 жылы 88 азаматқа 295,6 млн теңге несие берілген. «Ауыл шаруашылығын қаржылай қолдау қоры» арқылы 107 азаматқа шешім шықты. Нәтижесінде ауданда несие алушылар көмегімен 85 жаңа жұмыс орны ашылды.
 
Жаушықұм ауылының тұрғыны Гүлсінай Көшікбаева осыдан 6 ай бұрын бағдарламаға қатысып, кәсіпкерлік мектебінен дәріс тыңдады. Мемлекеттен 1 млн. 300 мың теңге несие алды. Осы қаржыға елдімекеннен  тігін шеберханасын ашып отыр. 30 жылға жуық тігіншілікпен айналысқан Гүлсінай екі азаматшаға тұрақты жұмыс ұсынды.  
 
Гүлсінай Көшікбаева, кәсіпкер, «Сымбат» тігін орталығының басшысы:
 
Бізге келушілер көп. Отандық өнім, сапамыз жақсы. Қолжетімді баға өзіміздің отандық өнімді шығарғанымыз үшін. Келешекте тағы үлкейтемін деген ойым бар. Тағы да осы Жаушықұм ауылынан сән салонын ашамын деген ойым бар. Оның бәрі - енді келешектің еншісінде.
 
«Жұмыспен қамту-2020 жол картасы» бағдарламасы. Жоба іске асқалы ауданда 45 нысанға күрделі және ағымдағы жөндеу жұмыстары жүргізілді. «Кәсіпкерлік бастаманы ынталандыру»  мақсатында «Ырыс» микроқаржы ұйымы мен «Ауыл шаруашылығын қаржылай қолдау қоры» арқылы 230 азаматқа өз кәсіптерін ашу және кеңейту мақсатында несие берілген. Ал,  жастар практикасына 72 млн. 150 мың теңге қаржы бөлінді. Нәтижесінде 559 жас маман жұмысқа орналасты.  
 
Айдана Бақытқызы, тігінші:
 
Мұнда мен келгеніме өте қуаныштымын және алатын жалақым да өзіме жеткілікті, қанағаттандырады. Және де біз мұнымен шектеліп қалмаймыз деп ойлаймын. Алда үйренетінім әлі көп.
 
Игі істер жалғасын табуда.  Жұмыс берушінің қажеттілігіне орай 10 азамат балықшы мамандығын игеріп шықты. Өйткені, бұл кәсіптің иелері Шардарадағы балық зауыттарына ауадай қажет.
 
Гүлмира Оңласбек, "Қазақстан-Шымкент" ТА
http://shymkenttv.kz/kz/news/shagyn_orta_biznes_oko/memleket-komegimen-kesibin-ashty-mamandygyn-auystyrdy   

Back